وكأن الماضي دايمن أحلي
دايمن في حاجة بتشدني للماضي لما برجع للمكان اللي عشت فيه طفولتي واتربيت فيه ببقي فعلا زي المجنونة بمشي في الشارع اضحك وأغطي وشي بايدي علشان أداري ضحكتي بتبقي ضحكة من القلب والعين سوا كل شبر هناك كل حتة بمشي فيه ليا فيها ذكري ياااه هنا كنت بمشي مع صحباتي هنا كنا بنضحك هنا كنا بنجري ونتسابق
كل ركن في الشارع ايوة حنفية الميه دي ياما شربت منها ,يااااه المحل ده كنا بنجيب منه لبن بالشكولاتة بعد ما نخرج من المدرسة
لما بمشي علي النيل هناك واركب المركب وافتكر لما كنت بشتري الايس كريم
ولما امشي واشوف حد كنت بعرفه أو حتي عارفة مجرد شكله ببقي سعيدة جدا بس للاسف السعادة دي بقت مقترنة بالحزن لان بفتكر ان كل ده خلاص بقي ذكريات مجرد ذكريات معدتش بملك من المكان ده غير ذكريات
وفي لحظة واحدة وأنا مشيه في نفس الشوارع ومع أني كنت لسه بضحك من دقايق القيني بدمع وبدل ما أخبي ضحكتي بخبي الدمع
واسال نفسي هي الايام دي مش هترجع تاني
مع أني عارفة الاجابة مسبقا وعارفة أنها مش هترجع تاني
طبعا مش كل حياتي هناك كانت بمنتهي السعادة أكيد كان فيها متاعب وبعض الاحيان حزن بس دايما كان في أمل كان في حلم كبير كان في أمنيات ببكرة كبير
مش لقيه حاجة أعبر بيها أكتر من أبيات لأمل دنقل
هل تري؟
هي اشياء لا تشتري
ذكريات الطفولة بين أخيك وبينك
حسكما فجأة بالرجولة
هذا الحياء الذي يكبت الشوق حين تعانقه
الصمت مبتسمين لتانيب أمكما
وكأنكما
ما تزالان طفلين
.jpg){kind=link}