قتال جديد في لبنان
جرعه جديدة من المرار
مزيد من القتل والدمار
العدو مجهول الهوية
والضحية ماتزال هي الضحية
مهزله جديدة من مهازل العرب المسرح المرة دي كان في لبنان 0 انفجار في طرابلس وبعد الانفجار وخراب الديار الجيش يدخل مخيم للاجئين الفلسطنين وتستمر معركه ما بينه وما بين حركة فتح الاسلام اللي محدش كان سمع عنها قبل كده قبل ما المعجنه دي تحصل 0 مخيم نهر البارد بيضم 45 الف لاجئ فلسطين, يدخل الخيش اللبناني وتبدا المعركة ومحدش عارف ايه فتح الاسلام دي وتبدا الاتهامات علي طول وبما انهم متمركزين في مخيم لاجئين يبقي اكيد فلسطنيين يطلعوا علينا تاني يوم في الاخبار والمرة دي سمعت الخبر ده في نشرة اخبار امريكية وهقولكم اني صدقت الامريكان ومع الاسف, حركة فتح الاسلام دي بتتكون من مقاتلين عرب ومش فلسطنيين هربوا من العراق واتجهوا للبنان 0
استمرت المعركة في المخيم لمده يومين ووسط تبادل اطلاق النار وضرب مدفعية الجيش اللبناني للمباني اللي بيعتقدوا ان المقاتلين متمركزين مع انباء عن وجود طرف ثالث بيضرب علي الفريقين طبعا لاشعال الامور فيها تم تناسي ان في مدنيين ومش مدنيين عاديين لا كمان في الاصل لاجئين يعني ناس الظروف طحناهم من غير مدافع ولا دبابات
الوضع المعيشي متدهور من غير مياة ولا كهرباء ولا مؤن غذائية , جثث في الشورارع لمده يومين , هيئات الاغاثة تقصف هي الاخرة
مع تعتيم اعلامي لحد ما كاميرات قناة الجزيرة دخلت المخيم واظهرت للناس الوضع الانساني المفزع الي بيعيشه اللاجئين وحاله النزوح من المخيم منظر العربيات كان صعب جدا من كتر الناس اللي متكومة علي بعض جواها غير الناس اللي هربوا علي رجليهم
خبر تاني متعلق بالاحداث والمرة دي خرج المتحدث باسم وزارة الدفاع الامريكي يعلن للعالم ان الحكومة بتبحث طلب الحكومة اللبنانية بمساعدتها في القضاء علي فتح الاسلام, الحكومة اللبنانية اعلنت ان الكلام ده محصلش بس بصراحه برده صدقت الامريكان المرة دي
وكالعاده الواحد مش لاقي حاجة يقلها لغير ربنا يرحمنا ونفوق بقي ونعرف العدو الصح ونبطل نقتل في نفسنا
