مشهد عبقري

(المشهد ده من فيلم( اضحك الصورة تطلع حلوة
الفيلم ده من افضل الافلام العربي اللي بتفرج عليه كتير ومش بزهق منه
المهم بعد ما بتنتهي قصة الحب ما بين مني ذكي وكريم عبد العزيز بالصورة السخيفه جدا اللي انتهت بيها بنلاقي مني ذكي وقفه مع زميلتها علي السلم بره المدرج وهو بيفوت من جنبها وبيقلها انا اسف
هي ردت عليه رد جميل جدا قلتله ليه هو انت دوست علي رجلي.
بجد رد فظيع لانه ببساطة داس علي قلبها وكأن كلمة اسف دي كفايه أو كأنها ممكن ترجعها لحياتها قبل ماهو يدخلها

وفي مشهد تاني برده جميل أوي ما بين مني وجدتها في الفيلم سناء جميل كانت عبقرية في دور الجده
بتقلها يا ستي أنا مقلتلهوش يحبني هو حبني وخلاني أحبه
أنا مش عارف ازاي واحد يحب واحدة ويفضل يغمرها بحبه ويطاردها بالحب ده لغاية متحبه هي كمان وبعدين يجي يتخلي عنها في لحظة وبمنتهي البساطة كده

نكتة

كنت وقفه مع مامتي في المطبخ وهي كانت بتغسل جرجير وبتقلي كلي منه ده مفيد للاسنان .المهم بتحكيلي عن واحده كانت زميلتها زمان كانوا مرة بيكلوا مع بعض وكان في جرجير مع الاكل فماما اكلت الورقه الخضرة بس ورمت باقي العود فزميلتها قلتلها ايه ده انت بترمي العود ده هو ده اللي بيطري علي القلب .
انا وقعت علي نفسي من الضحك قلت ياااااااااه هو الموضوع سهل اوي كده هو العود ده اللي هيرطب القلب بس لو كده يبقي انا محتاجة فدان

بعيش معها

إيديا في جيوبي وقلبي طِرب
سارح في غربة بس مش مِغترِب
وحدي لكن وَنسان وماشي كده
بابتعد...ما اعرفش...أو باقترِب

كتبها جاهين وغنها منير مقدرش اقول اكثر من كده

نفسي ارجع لنفسي

هي راحت فين فين حد يدور معايا

دي كانت لسه هنا من قريب

من قريب انت متأكده

لا مش متأكده بس دي كانت هنا

يا تري هترجع تاني,انا نفسي أرجع لنفسي أصلها تاهت مني من كام سنة ,بس ياتري من كام سنة طيب هو الاحساس بالفقد ينفع يتقاس بالسنين ده كل يوم فيه ,لا مش كل يوم دي كل لحظة ضياع بتبقي عمر فوق العمر لما كانت معايا كنت عارفة انا رايحة فين وجاية منين,كنت رسمة دنيا كبيرة جاية كنت شايفة بكرة وهو جاي.

دلوقتي مش عارفة هل ياتري هترجع تاني يمكن راحت في رحلة وهترجع ياااااااااااااااة بس الرحلة طولت أوي لحد ما أنا خايفه أنها تتوه في الطريق.

القطار فات

لما حد يقلك القطار فات قله مش مشكلة لسه في وقت هستني اللي بعده

انا مستنية القطار يوصل محطتي

يارب ألحقه وميفتش هو كمان