حضرت حفلة لفرقه اسكندريللا في ساقية الصاوي أنا ورحاب صحبتي وكانت أول مرة ليا احضر حفلة موسيقيه والاول مكنش ليا مزاج اني اروح لكن رحاب كانت نفسها تروح ومش لقيه حد يروح معاها فوقفت اني اروح وكمان عزمتني علي الحفلةمكنتش اقدر ارفض بعد كده طبعا
المهم الحفلة كانت مختارات من اغاني سيد درويش والشيخ امام وبعض من اغاني الفرقه نفسها الفرقة بتتكون من
حازم شاهين بيعزف علي العود وبيغني
شادي مؤنس بيعزف علي العود وبيغني
نور بهجت بيانو
ايمن صدقي ايقاعات
سامية جاهين غناء
آية حميدة غناء
بصراحه كل الاغاني تقريبا وكل اعضاء الفرقه موهوبين وخصوصا حازم وشادي لانهم بيعزفوا وبيغنوا وبيلحنوا لكن حازم كان متميز جدا ربنا وهبه صوت مقدرش اقول عنه اقل من جبار وبيندمج جدا وهو بيغني وبيغمض عينه لدرجة ان لو حد مشفهوش قبل كده وشافه وهو بيغني هيقول انه ضرير
اما شادي ظهر جدا في اغنيه عن دير ياسين من كلمات احمد حداد ومن الحان شادي نفسه الاغاني مش بيظهر في اولها انها عن دير ياسين الاغنية بتتكلم عن ناس كانوا اصحاب حضارة وصار مشرديين انا وللوهلة الاولي لما سمعتها ربطها في ذهني بفلسطين وبعدها بينا احنا كمصريين لاننا برده كنا اصحاب حضارة واصبحنا دلوقتي اصحاب عيال كل واحد عايز يربي عيال ويعيش وزي مترميه الحياة يمشي معاها الاغنية كانت مؤسرة جدا والجمهور اول ما سمع كلمة دير ياسين تفاعل جدا ومكنتش قدرة اسمع اخر كلام في الاغنية من كتر التسقيف
عن باقي الفرقة كان ايمن عازف الايقاع متمكن وادائه رائع والبيانو مظهرش بشكل واضح الا في اخر اغنيه اللي هي اهل الشام وده تقريبا لان طابع الموسيقي الشرقية هي اللي كانت طاغية علي الحفلة
اما آية فبتتميز بالصوت الناعم اللي مش بيخلوا من القوة والرقه في نفس الوقت
سامية كانت اكتر من رائعه في اغنية الختام اللي هي اهل الشام لفؤاد حداد كانت متحمسه جدا جدا كنت تحس بصدق الاداء
اهل الشام كانت حسن الختام بدأت بموسيقي وعدها غنت آية ودخلت سامية في الغناء لغاية لما توقف الموسيقي ومتسمعش غير صوت سامية الملتهب وقبل الاخر تسمع نقر خفيف من ايمن علي الطبلة زي نقر المسحراتي وبيتصاعد النقر ده لحد ما يوصل للعزف والجمهور شارك في العزف بالتسقيف زي المسحراتي كانت القاعة كلها مندمجه مع بعض من عازفين لمغنيين لجمهور
بصراحه كانت تجربة جميلة جدا وان شاء الله هكررها تاني
دي قصيدة اهل الشام
حيوا اهل الشام يا اهل الله
صابرة وهشام ماشاالله
كلهم قد صام وقد صلي
يا ابو زيد الخيل ما تقلقشي
كلهن قد نام مؤدي الفرض
تحت هذا الليل وهذي الارض
قالوا للاحلام ما تقلقشي
ان يكن او كان ندي البلبل
في شجر لبنان ما عنقدشي
والرقابي اقلام مطاطية
تكتب الايام مطاطية
سبت شغلي وجيت اسحركم
دق قلبي في بيت مسافركم
مت ما استنيت لاخركم
يا تجار الزيت بخاطركم
شاعر حداد حيخبركم
ان اسمي جهاد بدمعاتي
اسمي الاستشهاد في طلعاتي
كنت رد بلال علي المدنة
يا ابو زيد هلال ورمضانا
كنت مهر النور ما غمضنا
شب فوق السور كما يلزم
لم ازل منصور ولم اهزم
عند ست بحور تغرقني
والجنان الحور تعرفني
حيوا اهل الله يا اهل الله
يا عباد الله عباد الله
تعرف الانسان من الطلة
حط قلبي شهود علي الطبلة
تعرف الانسان من الشوفه
لاتري مهواه ولا خوفه
لاتري ادناه بيدلي
لا تري اعلاه ولابيشهق
في شحوب النار في الازرق
والقمر مسروق وما جانا
جيت اغني شروق وميجانا
لاخرج مطرود ولاغيَب
قد ثبت في الدار واثبتها
هاديا للدار وهاديني
في امم اطوار يناديني
كنت في الاشعار ابو الطيب
من حمي لي الدار حمي ديني
سيفي من ابطال حمادينِ
يا نقا الاسلام طرح بُلبُل
في ندي الاسلام فلسطيني
مثل موج البحر مثل الموج
حيث لا تلتام جراحاتي
يبتدي من الان من الاتي
مثل موج البحر مثل الموج
قولوا للقلقان مايقلقشي
دولة الاحلام ما تقلقشي
تحت هذا الليل وهذي الارض
كلهم قد نام مؤدي الفرض
يا ابو زيد الخيل ما تقلقشس
كلهم قد صام وقد صلي
صابره وعصام وماشا الله
حيوا اهل الشام يااهل الله
يا عباد الله عباد الله
هناك 9 تعليقات:
أول انطباع لي بعد الحفلة دي إني مش هفوت حفلة لاسكندريلا بعد كده
وكمان أي حاجة لسيد درويش والشيخ إمام حتى لو رحت لوحدي
بس الحاجة الجمبلة إن انتمائي للبلد المنكوبة دي زاد أوي من ساعتها لأني حسيت إن الناس بتعمل أي حاجة للبلد دي حتى لو كان غنا
الله يسهلة
ناس ليه حفلات وناس ليها ترتر
:)
فكرة يا رحاب لما قلتيلي الواحد هيخرج من الحفلة دي والشحنة الوطنية عنده عالية اوي
انا بقي قلت في نفسي اه بس اول لما نصبح الصبح ونقرأ اي جرنان من الجرايد المحترمة هنتغم ونفوق علي الحقيقة
ايه يا عم شادي ما انت شغال رحلات ومبتقلش بس صحبك نشر الصور بتاعت رحلة الغردقه
يلا اقر شوية انا كمان
طيب والله جميل
شكلها كده حفلة حلوة
بس هو الاسم مكتوب غلط ولا انا بيتهيألى
:اسكندرللا
طيب يعنى ايه
بما انك حضرتى الحفلة
وبعد كدة انت بتعيرى شادى ليه برحلة الغردقة
الراجل احنا طلعناه بالعافية معانا
من غيره متنفعش الرحلة
ربنا يزيدك حفلات ويزيدك انبساط
أنا مررتلك تاج
:)
m3lsh ana asfa
hst3eeeeeer kelmth
ناس ليه حفلات وناس ليها ترتر
waaaaaaaaaaaaaaaaaaaaaaaaaaaaaaaaaaaaaa2
علي فكرة يا دكتور الاسم كده صح بس معرفش معناه بس بيتهيقلي حاجة كده ما بين اسكندرية وسندريلا
بوست جميل وكلام جميل يخلي الواحد نفسه يغني كمان وكمان
:)
شكراً من كل قلبي
بس تصحيح بسيط: هي معظم أغاني الفرقة تأليف أحمد حداد لكن "دير ياسين" تأليف نجيب شهاب الدين. الشاعر الجميل اللي كتب للشيخ إمام أغاني زي "يا مصر قومي وشدي الحيل" و"سايس حصانك"
نشوفك الحفلة الجاية ان شاء الله
:)
إرسال تعليق